ЗИҚҚИНАФАС(АСТМА)

Бу касаллик асосан бронх йўллари шамоллашидан бошланади. Айниқса, куз ва баҳорда кучли қўзғалиб, тез-тез хуруж қила бошлайди.

Касалликни даволаш учун биринчи навбатда балғамдан тозалаш керак. Кўкрак қафаси, ўпка, ошқозон-ичакларда шилимшиқлар (балғам) йиғилиб, юрак фаолиятига таъсир этиб, бошни оғритади. Шу сабабли тозаланмаса бурунни балғам шиллиқлари тўсиб, нафас олишни қийинлаштиради, қон-томирларининг торайиши натижасида ҳансираш юзага келади.

Табобат муолажаларидан:

  • Игир илдизи, қора ҳалила, кунжут ва тотум уруғлари кукунларидан 20 г дан, қора зира, долчин кукунидан 30 г дан, зиғир уруғи кукунидан 40 г, аччиқ бодом унидан 25 г, шакар 60 г, райҳон гули кукунидан 200 г, занжабил кукунидан 12 г, қора андиз илдизидан 15 г олиб барчаси ярим кг асал билан аралаштирилади ва сирли идишдаги қайнаб турган сувга солиниб, икки соат қайнатилади. Зирк ёғочидан тайёрланган капгирда аралаштириб пиширилади. Тайёр дорини ҳар куни уч маҳал овқатдан бир соат олдин бир чой қошиқдан тўрт ойу ўн кун ичилади. Сўнгра ўн кун дам олиб, муолажа яна давом эттирилади, ора йўлда тўхтатмаслик керак. Бу синовдан ўтган тадбир, албатта даво бўлади. Аммо парҳезга жиддий риоя этиш лозим. Сут, қатиқ, аччиқ, шўр, спиртли ичимликлар истеъмол қилинмайди.
  • Саримсоқ ва ерқалампирдан 100 г дан олиб майдаланади ва бўтқа ҳолига келгунча аралаштирилади. 600 г асални озгина сув буғида иситиб, унга 150 г сариёғ қўшилади ва яхшилаб қориштирилади. Қоронғи ва салқин жойда, идиш оғзи яхши ёпиқ ҳолда сақланади. Кунига бир ош қошиқдан овқатдан бир соат олдин истеъмол қилинади. Даволаниш муддати – икки ой. Зарурият бўлса, муолажа бир ойдан сўнг такрорланади.
  • Бир чой қошиқ мойчечак гули устига бир стакан қайноқ сув қуйиб, паст оловда ўн беш дақиқа қиздириб, 30-40 дақиқа дамлаб қўйилади. Кунига бир стакандан 2-3 маҳал ичилади.
  • Бир ош қошиқ зубтурум барги устига бир стакан қайноқ сув қуйиб, икки соат тиндириб қўйилади. Сузиб, овқатдан 20 дақиқа олдин кунига тўрт маҳал бир ош қошиқдан ичилади.
  • Бир бўлакча оқ гилос елимидан олиб, бир литр сувда қайнатилади. Совигач сузиб олинади ва устига 200 г асал, уч донадан қалампирмунчоқ ва занжабил қўшиб, яхшилаб қорилади. Кунига икки маҳал – наҳорга ва кечқурун бир ош қошиқдан истеъмол қилинади.
  • 100 г дан иссоп, маврак ва себаргадан олиб яхшилаб аралаштирилади. Уч ош қошиғини кечқурун термосга солиб, устига уч стакан қайноқ сув қуйилади. Эрталаб сузиб, кунига тўрт маҳал овқатдан 40 дақиқа олдин 150 г дан ичилади.
  • 100 г дан ертут, бинафша ва мавракдан олиб аралаштирилади ва уч ош қошиғини кечқурун термосга солиб, устига уч стакан қайноқ сув қуйилади. Эрталаб сузиб, кунига тўрт маҳал 150 г дан ичилади.
  • 100 г дан тоғрайҳон, маврак ва кўкадан олиб аралаштирилади ва уч ош қошиғини кечқурун термосга солиб, устига уч стакан қайноқ сув қуйилади. Эрталаб сузиб, кунига тўрт маҳал овқатдан ярим соат олдин 150 г дан ичилади.
  • Ялпиздан 100 г, жўка гулидан 75 г олиб аралаштирилади ва икки ош қошиғини кечқурун термосга солиб, устига икки стакан қайноқ сув қуйилади. Эрталаб сузиб, кунига тўрт маҳал овқатдан ярим соат олдин ярим стакандан нафас қисганда ичилади.